Nagpasidaan ang kampo ni kanhing House Speaker o Leyte 1st District Rep. Martin Romualdez nga posibleng ipugos ni former Department of Public Works and Highways (DPWH) Secretary Manuel Bonoan nga ilambigit si Romualdez sa imbestigasyon sa Office of the Ombudsman kalabot sa giingong flood control scam.
Sumala pa ni Atty. Ade Fajardo, tigpamaba sa kongresista, nga wala pay gipakitang ebidensiya nga naglambigit sa former House Speaker sa maong kaso ug nagpabilin lamang nga mga alegasyon ang mga pasangil batok kaniya.
Gipahayag usab ni Fajardo nga makapabalaka ang mga report nga posibleng motestigo si Bonoan batok kang Romualdez, bisan pa nga kapin na sa usa ka tuig sukad migawas ang maong isyu apan wala pa kini misulti batok sa dating Speaker.
Posibleng nakasinati matud pa si Bonoan og dakong pressure tungod kay anaa kini karon sa hospital arrest ug mahimong ibalhin sa regular nga prisohan kung tugotan na sa mga doktor.
Matud pa ni Fajardo nga hangtod karon wala pa sila makadawat og subpoena gikan sa Office of the Ombudsman ug andam silang tubagon ang bisan unsang reklamo kung magsugod na ang pormal nga imbestigasyon.
