Gipahayag ni Bicol Saro Party-list Rep. Terry Ridon nga alang kaniya “tapos na” ang isyu sa gikaingong misuse sa confidential funds, bribery, ug unexplained wealth batok kang Vice President Sara Duterte, ug igo na kuno ang ebidensya aron makabuo og probable cause sa impeachment case.
Sumala kang Ridon, klaro nga adunay lig-on nga basihan ang mga alegasyon, ilabina ang report sa Anti-Money Laundering Council nga nagbutyag nga adunay mokabat sa P6.7 billion nga “covered” ug “suspicious” transactions nga konektado kang VP Sara ug sa iyang bana nga si Manases Carpio gikan 2006 hangtod 2025.
Gikanayon sa opisyal nga bisan pa og inflows ug outflows ang maong mga transaksyon, dako gihapon ang kalainan kumpara sa gideklarang bahandi sa Bise Presidente.
Gipunting usab niini ang giingong P40 million nga transaksyon niadtong 2022 nga dili kuno motakdo sa iyang deklaradong net worth nga mga P70 million lamang.
Dugang pa, bisan pa ang kinatibuk-ang kita sa magtiayon isip mga abogado ug opisyal sa gobyerno, lakip ang ilahang income tax records nga gibanabanaan nga P73 million, dili gihapon makapasabot sa binilyon nga lihok sa kwarta sa ilahang mga account.
Samtang, gilauman nga pagahukman sa Abril 29 ang sunod nga lakang sa House Justice panel kalabot sa impeachment complaint batok kang VP Sara.
