Gilauman nga mahuman sa Impeachment Court ang bahin sa impeachment case nga adunay kalabotan sa giingong grave threats ni Vice President Sara Duterte sa dili pa matapos ang bulan sa Hulyo.
Sumala ni Senate Impeachment Court Spokesperson Atty. Reginald Tongol, mipaspas ang proseso human giatras sa prosekusyon ang pagpresentar sa unom pa ka mga testigo alang sa Article 4 sa impeachment complaint.
Tungod niini, gilauman nga mosunod na ang pagdungog sa alegasyon bahin sa giingong sayop nga paggamit sa confidential funds sa Office of the Vice President (OVP) ug Department of Education (DepEd).
Sa Article 1 sa impeachment complaint, giakusahan ang Bise Presidente og paglapas sa public trust ug graft and corruption tungod sa giingong sayop nga paggamit ug pag-liquidate sa kinatibuk-ang ₱500 milyon nga confidential funds sa OVP ug ₱112.5 milyon gikan sa DepEd.
Giandam na sa prosekusyon ang pagpresentar sa tulo ka mga testigo alang sa maong isyu. Lakip kanila sila Marivic Pareja sa Legislative Archive Museum sa House of Representatives, Violeta Constantino, kanhing manager sa Landbank Shaw Boulevard Branch, ug Leonita Camposano, kanhing manager sa Landbank DepEd Branch.
Sumala ni Senate President ug Presiding Officer Francis “Chiz” Escudero, tapuson una sa prosekusyon ang presentasyon sa tanang articles sa impeachment complaint sa dili pa magsugod ang depensa sa pagpresentar sa ilang mga ebidensya.
