Gipasabot sa Impeachment Court ang resulta sa mga gihangyo nga subpoena sa prosekusyon may kalabotan sa mga rekord pinansyal ni Vice President Sara Duterte, diin adunay mga gipanghatag nga giuyonan ug mga gipangbalibaran sa hukuman. Gihatagan og pabor o gi-granted sa korte ang hangyo sa prosekusyon nga makakuha og tax records ug peso bank accounts ni Duterte, iyang bana nga si Manases Carpio, 19 ka mga korporasyon, ug usa ka partnership nga nagsugod pa niadtong 2007.
Apan wala tugoti sa Impeachment Court ang subpoena alang sa foreign currency deposit records o mga dollar account, gawas lamang kung adunay pormal nga sinulat nga pagtugot gikan sa mga depositor. Dugang pa niini, giuyonan usab sa korte nga makuha ang mga rekord gikan sa Anti-Money Laundering Council o AMLC nga may kalabotan kang Duterte, Carpio, 19 ka korporasyon, ug usa ka partnership, apan ipailalom una kini sa pribadong pagsusi aron masiguro nga walay sensitibong impormasyon o tinaguan sa estado ang mabutyag.
Gibalibaran usab sa hukuman ang mga hangyo nga may kalabotan sa JTC Group ug Pikimong Pikimong human wala maila si Duterte ug Carpio isip mga shareholder niini nga mga entidad. Sumala pa, gihatagan og panahon ang Bureau of Internal Revenue (BIR) , mga bangko, ug AMLC hangtod sa Hulyo 30 aron isumite ang mga dokumentong gikinahanglan sa korte.
Kahinumduman nga ang maong mga desisyon nakita isip importante nga lakang sa pagpadayon sa impeachment trial, diin gitutokan sa hukuman ang pagbalanse tali sa pagkuha sa mga ebidensya ug pagpanalipod sa sensitibong impormasyon ug seguridad sa nasod.
