Miabot na sa Pilipinas ang ikatulong 8-car trainset alang sa North-South Commuter Railway o NSCR, Malolos-Tutuban segment, ug karon giproseso pa sa Bureau of Customs ang importation niini.
Gilauman nga dad-on ang maong trainset sa Malanday Depot sa Valenzuela City human makompleto ang proseso sa Customs. Sumala ni Transportation Secretary Banoy Lopez, padayon nga gisubay sa Department of Transportation ang pag-uswag sa konstruksyon sa NSCR.
Gipatin-aw sa ahensya nga ang maong trainset gipalit gikan sa Japan Transport Engineering Company ug Sumitomo Corporation isip bahin sa Contract Package 03 o Rolling Stock. Gilangkuban sa 147 kilometros ang NSCR system nga adunay 35 ka estasyon ug magkonektar kini sa Central Luzon, Metro Manila ug Calabarzon.
Gilauman nga mokabat sa 800,000 ka commuter kada adlaw ang makabenepisyo sa proyekto kung mahimong hingpit ng magamit kini. Samtang, gilauman usab nga moabot sa Pilipinas ang usa pa ka trainset alang sa NSCR sa Oktubre ning tuiga.
Sa pagkakaron, target sa Department of Transportation nga sugdan ang partial operations sa ruta gikan Valenzuela hangtod Malolos, Bulacan sa ika-upat nga kwarter sa 2027.
