Gilimod ni House impeachment adviser ug prosecution spokesperson Robert Ace Barbers ang alegasyon nga gipaspasan ang impeachment trial ni Vice President Sara Duterte aron mahuman kini sa dili pa mobisita sa Pilipinas si US President Donald Trump gikan Nobyembre 13 hangtod 17,2026 dungan sa ASEAN Summit.
Sumala kang Barbers, gisunod lamang sa Senate Impeachment Court ang trial order nga gikasabutan sa prosecution ug defense panels sa wala pa magsugod ang paghusay kapin tulo ka bulan ang milabay.
Lakip sa maong kasabutan ang mga isyung hisgotan, mga testigo ug mga dokumentong ipresenta sa mga senador nga nagsilbing mga huwes sa impeachment trial.
Pagpasabot ni Barbers nga ang mga kausaban sa iskedyul adunay kalabotan sa buluhaton sa Senado, lakip ang deliberasyon sa gisugyot nga 2027 national budget.
Human dawaton sa impeachment court ang pag-withdraw sa tulo ka articles of impeachment kaniadtong Oktubre 13, Article II na lamang ang nahibilin. Naglangkob kini sa mga alegasyon bahin sa unexplained wealth, mga kabtangan nga wala maideklara ug gidili nga interes sa negosyo nga giatubang ni Duterte.
Gipanghimakak usab ni Barbers nga adunay politikal nga motibo ang pagtaral, lakip ang giingong pagsulay nga maimpluwensiyahan ang 2028 presidential elections.
Una nang gipahibalo ni Duterte ang iyang plano nga modagan sa pagkapresidente sa 2028, apan kung mapamatud-ang sad-an sa impeachment trial, mahimo siyang matangtang sa puwesto ug madid-an sa paghawid og bisan unsang posisyon sa gobyerno, subay sa mga gitakda sa Konstitusyon.
