Gipahimangnoan sa Philippine Embassy sa Italy ang mga Pilipino nga mag-amping ug magpabiling alerto tungod sa gipaabot nga mga demonstrasyon sa nagkalainlaing bahin sa nasod.
Sumala sa abiso sa embahada, gilauman ang mga bag-ong demonstrasyon karong Sabado, Oktubre 24, 2026, sa walo ka siyudad, lakip ang Rome, Milan, Florence, Turin, Bologna, Padua, Bari ug Genoa.
Tungod niini, giawhag ang mga Pilipino nga mosubay sa opisyal nga mga pahibalo sa lokal nga awtoridad ug maglikay sa mga lugar diin gikatakdang ipahigayon ang mga protesta aron malikayan ang posibleng peligro.
Ang mga demonstrasyon nalambigit sa mga reklamo kabahin sa taas nga gasto sa panginabuhi, kakulang sa pondo ug pasilidad sa sektor sa edukasyon, ug pagsupak sa paggasto sa gobyerno alang sa militar.
Kahinumdoman nga ang miaging mga protesta sa pipila ka siyudad sa Italy miresulta sa panagsangka tali sa mga pulis ug raliyista, kadaot sa pipila ka establisemento ug mga pagdakop. Tungod niini, gipalig-on sa mga awtoridad ang mga lakang sa seguridad sa mga apektadong lugar.
Samtang, sumala sa naunang taho sa Department of Foreign Affairs, walay Pilipino nga gikatahong nasamdan o nadamay sa mga kagubot. Bisan pa niini, nagpadayon ang pahimangno sa embahada nga unahon sa mga Pilipino ang ilang kaluwasan.
Gidasig usab sila nga planohon daan ang ilang mga biyahe tungod sa posibleng paglangan o pag-usab sa operasyon sa mga pampublikong transportasyon duol sa mga lugar nga adunay demonstrasyon.
