Gilauman sa Philippine Atmospheric, Geophysical and Astronomical Services Administration o PAGASA nga kapin upat pa ka tropical cyclone o bagyo ang posibleng mosulod sa Philippine Area of Responsibility o PAR sa dili pa matapos ang tuig 2026.
Base sa pagbanabana sa ahensiya, posibleng mosulod ang usa hangtod duha ka bagyo sa PAR sa Nobyembre, ug susamang gidaghanon usab sa Disyembre.
Dugang pa sa PAGASA, posibleng adunay usa ka bagyo nga mosulod sa PAR sa Enero 2027. Samtang, tali sa Enero hangtod Abril sa sunod tuig, gilauman usab ang posibilidad sa pagsulod sa duha pa ka tropical cyclone.
Sa pagkakaron, nagpadayon ang epekto sa Bagyong Rosal sa Extreme Northern Luzon. Bisan pa sa pagkahuyang niini sa miaging mga oras, nagpabilin ang Tropical Cyclone Wind Signal No. 2 sa Batanes ug sa amihanan-sidlakang bahin sa Babuyan Islands, lakip ang Babuyan, Panuitan, Calayan ug Camiguin Islands.
Nakaalerto usab ubos sa Wind Signal No. 1 ang nahibiling bahin sa Babuyan Islands, mainland Cagayan, amihanan-sidlakang bahin sa Isabela lakip ang Maconacon, Divilacan, Santa Maria, Cabagan, San Pablo ug Palanan,ingon man ang tibuok Ilocos Norte ug Apayao.
Samtang, posibleng makasinati gihapon og kalat-kalat nga pag-ulan ang pipila ka bahin sa nasod, busa gipahinumdoman sa PAGASA ang publiko nga magpadayon sa pagsubay sa opisyal nga mga weather bulletin ug pahimangno sa ahensiya.
