Gisuportahan sa House prosecution team ang pag-usab sa iskedyul sa impeachment trial ni Vice President Sara Duterte aron mapaspas ang dagan sa mga pagdungog human sa sunod-sunod nga postponements.
Matod ni Manila Rep. Joel Chua, abli ang prosecution sa proposal nga himuon ang trial gikan alas-2:30 sa hapon hangtod alas-7:30 sa gabii, o mas dugay pa kung gikinahanglan.
Dugang pa, target sa prosecution nga mahuman ang pagpresentar sa ilang mga ebidensya sulod sa Septiyembre.
Lakip sa ilang gikonsiderar ang pagkunhod sa gidaghanon sa mga testigo kung igo na ang testimonya ug ebidensya nga ilang nahatag sa impeachment court.
Sumala pa ni Chua, dili nila gustong maapektuhan ang kalidad sa kaso bisan pa sa ilang tinguha nga mapaspas ang trial.
Sa pagkakaron, gitutokan sa prosecution ang alegasyon sa giingong sayop nga paggamit sa P612.5 milyon nga confidential funds.
Kung makompleto kini, posibleng mosunod ang impeachment article bahin sa giingong unexplained wealth ni Duterte. | VIA BOMBO EROS PAJOTA
