Gipasabot sa House prosecution panel nga dili kini mangayo og pag-inhibit ni Senator-Judge Pia Cayetano sa impeachment trial ni Vice President Sara Duterte, bisan pa sa pagkaylap sa giingong manipulated video nga nagpakita kuno nga miangkon si House prosecutor ug Akbayan Rep. Chel Diokno nga naghimo sila og “fishing expedition.”
Sumala pa kang prosecution legal spokesman Atty. Benjamin Tolosa Jr., dili nila gusto nga ipunting ang isyu sa personalidad ug padayon nilang gisaligan si Cayetano. Dugang pa niini, posible pang giingong ang social media staff o mga handlers ni Cayetano ang nasayop sa pag-post sa maong video. Samtang, matod ni prosecution adviser ug spokesman Robert Ace Barbers, nasayod ang mga senator-judges sa tinuod nga konteksto sa miaging hearing may kalabotan sa hangyo nga ma-subpoena ang bank records ug tax records ni Vice President Duterte ug sa iyang bana nga si Atty. Manases Carpio.
Lakip sa iyang gipahayag ang pag-awhag sa publiko nga magmatngon batok sa sayop nga impormasyon ug dili dayong motuo sa mga nagkatag sa social media. Sa pagkakaron, nagpahayag si Barbers og pagsalig nga tumanon sa mga senator-judges ang ilang gipanumpaang katungdanan sa pagpabiling patas ug walay pagdapig sa nagpadayon nga impeachment trial.
