DAVAO CITY – Gihikay na karon sa kapolisan ang kaso batok ngadto sa gituohang nanag-iya sa daghanan nga sachet sa shabu nga mibalor ug kapin usa ka milyon ka pesos nga na-recover atol sa gilusad nga buy bust operation sulod sa usa ka pension house sa Quirino Avenue, ning dakbayan sa Davao kagabii.
Atol sa maong panahon nadakpan ang duha ka mga babaye nga mga suspek.
Naila ang mga dinakpan nga sila si Donesa Pansot, 35 anyos, ug Marilyn Rasonable, 25 anyos, nga pulos taga-Indangan, Buhangin, ning dakbayan sa Davao.
Mokabat ngadto sa pito ka mga medium sachet sa gikatuohang shabu nga mokabat ngadto sa otsenta y singko ka gramos, lakip na ang usa ka libo ka pesos nga buy-bust money ang na-recover gikan sa mga suspek.
Nasayran gikan kang Police Senior Inspector Michael Uyanguren, hepe sa Santa Ana Police gisugilon kanila sa suspek nga gikan sa Midsayap, North Cotabato ang illegal nga druga nga gipakatag nila dinhi sa dakbayan sa Davao.
Kaso nga pagsupak sa Republic Act 9165 kon Comprehensive Dangerous Drugs Act of 2002 ang kasong atubangon nila ni Pansot ug Rasonable.
