Mokabat sa kapin 700,000 pesos ang nakumpiska nga iligal nga droga kon shabu atol sa gilusad nga drug buybust operation kagahapon pasado alas Onsi sa Udto.
Subay sa report sa kapulisan, gilusad ang operasyon sa Purok 41, Yñiguez Subd, Brgy. Ma-a, ning syudad sa Davao nga miresulta sa pagkasikop sa duha ka mga drug pusher nga mga batan-ong lalaki nga sila alias “Mart,” 25-anyos ug “Craig,” 21-anyos nga mga residente sa Barangay Talomo Proper ning syudad.
Pinaagi sa hiniusang pwersa sa nagkalain-laing unit sa kapulisan sa pagpanguna sa Maa PNP, nasakmit ang gituohang shabu nga nagkantidad og Php 782,800.00.
Nakumpiska usab sa mga dinakpan ang motorsiklo nga gigamit sa transaksyon, samtang narekober usab ang buybust money.
Sa karon ang mga dinakpan ang giskostudiya na sa kapulisan samtang gitakakda karong adlawa nga pasakahan og kasong pagsupak sa RA 9165.
Samtang sa laing bahin, nakumpiska usab sa kapulisan sa Maa ang iligal nga droga ug armas atol sa gilusad nga drug buybust operation sa mga otoridad, pasado alas dos kagahapon sa hapon.
Nadakpan sa mga operatiba ang usa ka “high-value individual” ug nakumpiska ang kapin ₱176,000 kantidad sa gituohang shabu, uban ang iyang walay lisensyang pusil, atol sa entrapment operation Ward 42, Midland Village, Barangay Ma-a.
Giila ang dinakpan nga si alyas James Artel hamtong ang panuigon nga residente sa maong lugar. Sa pagkakaron ang suspek ang gikustodiya na sa kapulisan samtang napasakahan na og kasong paglapas sa Republic Act 9165.
