Gipatin-aw sa Department of Social Welfare and Development (DSWD) nga dili na kinahanglan og Comelec Certification aron makadawat og cash aid ang mga kwalipikadong PUV drivers.
Sumala pa sa DSWD, igo na lamang ipakita ang valid driver’s license aron mapadali ang proseso sa pagkuha og financial assistance ubos sa programa.
Giklaro ni DSWD spokesperson Asec. Irene Dumlao nga ang mga report nga nagkinahanglan pa og Comelec Certification sa Cebu city sa pipila ka habal-habal drivers dili sakto ug wala sa standard requirements sa programa.
Gipasiugda usab nga ang ₱5,000 cash aid ilalom sa Assistance to Individuals in Crisis Situation (AICS) program gitumong para sa mga PUV drivers nga apektado sa pagsaka sa presyo sa lana.
Gisugyot sa ahensya nga ang ubang sektor mahimo gihapon mo-avail sa cash assistance pinaagi sa ilang mga opisina sa tibuok nasod ubos sa AICS program.
Gipahimangnoan sa DSWD ang publiko nga sundon lamang ang opisyal nga requirements aron malikayan ang kalibog ug sayop nga impormasyon sa pagkuha og ayuda.
