DAVAO CITY – Nahimong malampuson ang ikatulong hugna sa Hakbang ng Maisug prayer rally nga gipahigayon sa probinsya sa Davao del Norte niadtong Abril 14.
Subay sa datos sa Davao del Norte Police Provincial Office ug Tagum City Police, miabot sa kapin-kulang 7,500 ka mga tawo ang nagkatapok-tapok sa Davao del Norte Sports Complex.
Sama sa naandan, gilauman sa mga Dabawnon ang presensya ni kanhi Pangulong Rodrigo Duterte ug mga personalidad sa probinsya nga nagpadayag og pagbatikos sa kasamtangang administrasyon.
Nahimong sentro sa politikanhong krisis niadtong milabay nga simana ang probinsya sa Davao del Norte gumikan sa pagpa-suspend kang Governor Edwin Jubahib, butang nga nakapahingpit karon sa kadasig sa mga tagasuporta sa gobernador sa probinsya dungan sa pagsaway sa mga kaatbang sa adminstrasyon.
Hugot ang gipatumang seguridad sa maong panagtapok, sukwahi sa taho nga go-pull out sa 10th Infantry Division ang ilang kasundaluhan sa event.
Sumala ni 10ID Commander Major General Allan Hambala, walay kamatuoran ang taho nga gipa-pull out sila ni Presidential Assistant for Eastern Mindanao Leo Tereso Magno sa venue.
Dugang pa nga gipapirme nila ang mga tropa alang sa extra layer of security atol sa maong prayer rally, human sa nahitabong pakighinabi niini kang Governor Jubahib.
Atol sa gipahigayong Hakbang ng Maisug prayer rally sa Davao del Norte, present ang daghanang mga personalidad nga sila Davao City Mayor Sebastian Duterte, Tagum City Vice Mayor Allan Rellon, Davao del Norte First District Representative Pantaleon Alvarez, kanhi executive secretary Vic Rodriguez, ug kanhi presidential spokesperson Harry Roque.
Gilauman sab ang presenya ni Davao del Norte Governor Edwin Jubahib apan nagpaambit kini sa iyang mensahe pinaagi sa video message.
via || Bombo LJF
