Usa ka gidudang street-level drug personality ang nasikop sa kapolisan atol sa buy-bust operation sa Barangay Aplaya, Digos City, Davao del Sur.
Sumala sa report, ang suspetsado nga nailhan lamang sa alyas nga “Yoy” nadakpan alas-10:10 sa gabii sa Hulyo 28 pinaagi sa hiniusang operasyon sa Digos City Police Station, Philippine Drug Enforcement Agency kon PDEA, Provincial Drug Enforcement Unit ug ubang mga intelligence personnel.
Narekober sa operasyon ang upat ka pakete sa gidudahang shabu nga adunay gibana-banang gibug-aton nga 3.68 gramos ug standard drug price nga P28,704.
Nakuha usab sa mga operatiba ang buy-bust money, usa ka cellphone, coin purse, belt bag ug kuwarta nga gituohang gigamit o adunay kalabotan sa ilegal nga kalihokan.
Base sa report, gihimo sa mga operatiba ang pagmarka ug pag-imbentaryo sa tanang narekober nga ebidensya didto mismo sa lugar sa operasyon atubangan sa mga saksi ug sa suspetsado, subay sa gikinahanglan sa balaod.
Ang suspetsado karon gipailalom na sa kustodiya sa kapolisan ug giandam na ang kasong paglapas sa Republic Act 9165 o Comprehensive Dangerous Drugs Act of 2002.
Padayon ang panawagan sa mga awtoridad sa publiko nga ipadayon ang paghatag og impormasyon batok sa ilegal nga droga aron mapalig-on pa ang kampanya batok sa maong ilegal nga kalihokan sa komunidad.
