Nagtuo si kanhi presidential spokesperson Harry Roque nga gamay ra ang posibilidad nga tugotan sa International Criminal Court (ICC) ang hangyo sa prosekusyon nga dawaton ang naunang narekord nga testimonya sa duha ka saksi sa kasong crimes against humanity batok kang kanhi Pangulong Rodrigo Duterte nga dili na ipaagi sa cross-examination.
Gipasabot ni Roque nga angay hatagan ang depensa og higayon nga mangutana ug mosusi sa mga pahayag sa mga saksi, ilabina kung direktang nagdugtong ang ilang mga testimonya kang Duterte sa giingong mga pagpatay atol sa kampanya batok sa ilegal nga droga.
Sa pagbana-bana ni Roque, moabot sa 80% ang posibilidad nga dili uyonan sa korte ang hangyo sa prosekusyon.
Gisupak usab sa defense team ni Duterte, nga gipangulohan sa British lawyer nga si Peter Haynes, ang hangyo sa prosekusyon nga dawaton ang mga naunang narekord nga testimonya nga dili na ipaatubang ang mga saksi sa pagdungog sa ICC Trial Chamber III.
Importante ang cross-examination aron masuta ang mga panagsumpaki sa mga pahayag ug matimbang ang kredibilidad sa mga saksi.
Apan, ang kataposang desisyon kung dawaton ba ang mga testimonya nga walay cross-examination anaa ra gihapon kini sa ICC.
Sa kasamtangan, gipaabot ang pagsugod sa paghusay batok kang Duterte sa Nobyembre 30, 2026, samtang nagpadayon ang mga lakang sa korte kalabot sa mga isyu sa ebidensiya ug mga testimonya sa mga saksi.
