Miapela sa Korte Suprema ang kampo ni Senador Jinggoy Estrada aron hangyoon nga balihon ang desisyon sa Sandiganbayan nga wala motugot kaniya sa pagtambong sa impeachment trial ni Vice President Sara Duterte-Carpio. Sumala pa sa mga dokumentong gisumite, mipasaka ang kampo ni Estrada og petition for certiorari batok sa desisyon sa Sandiganbayan Fifth Division nga misalikway sa iyang mosyon niadtong Hulyo 9, 2026.
Dugang pa niini, gipahayag sa Flaminiano Arroyo & Dueñas Law Firm nga adunay grave abuse of discretion amounting to lack or excess of jurisdiction ang Sandiganbayan sa dihang gisalikway ang hangyo sa senador. Lakip sa gipasabot sa mga abogado nga bisan pa man ug gipailalom si Estrada sa detensyon sa New Quezon City Jail tungod sa kasong plunder nga iyang giatubang, nagpabilin gihapon ang iyang katungdanan isip incumbent senator ug halal nga magbabalaod.
Kahinumduman nga gibutyag usab sa kampo ni Estrada nga ang impeachment trial usa ka konstitusyonal ug makasaysayang proseso nga nagkinahanglan sa personal nga presensya sa tanang senator-judges aron matuman ang ilang katungdanan. Sa kasamtangan, nagpadayon ang pag-atubang ni Estrada sa kasong plunder nga may kalabotan sa gipasangil nga mga iregularidad sa flood control projects.
