Gipadayag sa Energy Regulatory Commission (ERC) nga wala pa’y aktuwal nga timeline kung kanus-a masugdan ang pag-apil sa nuclear power sa energy mix sa Pilipinas.Nagkanayon si ERC Chair, Atty. Francis Saturnino Juan nga bisan pa og nagpadayon na ang mga pagtuon ug konsultasyon nga gipangulohan sa Department of Energy (DOE), magdepende gihapon ang hingpit nga pagpatuman sa nuclear power sa Pangulo, DOE, ug sa suporta sa Kongreso.
Gisuportahan sa komisyon ang mga capacity building, training, ug field study aron mapaspasan ang pagbalhin ngadto sa nuclear energy, nga usa sa mga prayoridad sa kasamtangang administrasyong Marcos. Dugang pa ni ERC Chair Juan nga magpadayon ang mga training aron andam ang gobyerno sa paghimo og mga regulasyon ug angay nga mga polisiya alang sa nuclear regulation sa higayon nga kinahanglanon na kini.
Gipaspasan na usab sa gobyerno ang tanang angayng lakang aron masugdan ang maong programa, apan gisiguro nga mabinantayon ang pagpatuman niini pinaagi sa padayon nga mga pagtuon.Lakip sa mga nag-unang gikonsiderar sa power sector ang seguridad ug kaluwasan dili lamang sa mga katawhan kondili sa tibuok Pilipinas.
