DAVAO CITY – Gipahigayon na ang exposition opening sa Kadayawan Durian Festival kagahapon, Agosto 12, ning tuig sa SM Lanang ning syudad human kini na-undang gumikan sa pandemya.
Nahimong sentro sa expo sa maong aktibidad ang durian ug uban pang mga ilado nga prutas sa dakbayan sama sa marang, rambutan, lanzones, mangosteen ug pomelo.
Gi-organisa ang maong festival sa ahensya sa Department of Agriculture kauban ang Department of Tourism, Davao City Agriculturist’s Office, Durian Industry Association of Davao City ug usa ka mall ning syudad.
Nisalmot sa gihisgutang kapistahan sila DA Regional Director Abel James Monteagudo, DOT Regional Director nga si Tanya Rabat Tan, CAGRO officer-in-charge nga si Eduardo Haspe, Councilor Marissa Abella, VP Operations John Tiu, DIADC President Emmanuel Belviz ug uban pa.
Sumala ni Monteagudo nga nakatampo og 78% sa produksyon sa durian ang nasud ug ang katunga niini gikan sa Davao City.
Dungag pa niya nga ang durian festival dili lamang pagpakita sa atong prutas apan magsilbi kini nga usa ka maayong linkage sa merkado sa lokal, nasyonal, internasyonal nga mga mamalitay.
Sa laing bahin, gibutyag ni Abella nga ang siyudad kinahanglang mopauswag sa produksiyon sa durian pinaagi sa pagtabang sa mga mag-uuma, paggamit sa pinakabag-o nga teknolohiya niini, ug pagtikad sa labing maayong kalidad nga mga seedling.
Matud pa usab niya nga kini na mga paningkamot na dili makab-ot kung dili tungod sa suporta sa mga konseho ngadto sa agrikultura.
Sa kasamtangan, ang mga delegado gikan sa Chinese Consulate nagsusi sa kalidad sa durian aron makahimo og direkta nga linkage sa durian sa siyudad ngadto sa ilahang merkado.
Ang Kadayawan Durian Festival magsugod gikan Agosto 12 hangtod Setyembre 12 ning tuig kasamtangan.
Via || Bombo David Francisquete
