DAVAO CITY – Napuhag ang usa ka drug den sa may Brgy. Poblacion, Malita, Davao Occidental atol sa gikasang buy-bust operation kagahapon sa gihiusang pwersa sa Malita Municipal Police ug Philippine Drug Enforcement Agency Regional Office 11.
Target sa maong operasyon ang tag-iya sa maong drug den nga si Rodrigo Rodriguez alyas Rolly, 68-anyos, empleyado sa Davao Occidental LGU ug residente sa nasangpit nga dapit.
Positibong napalitan sa poseur buyer si alyas Rolly ug usa ka pakete sa gituohang shabu nga mubalor sa P15,000 ang kantidad.
Nasikop sab ang duha ka public school teacher nga sila Isabel Tanggo ug Haren Fel Tagose nga nasakpang nagsuyop ug shabu sulod sa drug den.
Narekober gikan sa suspek ang mga ebidensya sama sa lain pang duha ka pakete kon kapin kulang onse gramos nga shabu nga nagkantidad ug P165,000; tulo ka pakete sa gituohang ugang dahon sa marijuana; mga drug paraphernalia ug kwartang gigamit sa maong operasyon.
Kasong paglapas sa Republic Act 9165 o Comprehensive Dangerous Drugs Act of 2002 ang atubangon sa mga dinakpan samtang gipaslak sa prisohan sa Malita Police Station.
via || Bombo LJ Florendo
