DAVAO CITY – “Head on Collision” ang nahitabo sa duha mga sakyanan human nga usa sa mga drayber ang nakatagpilaw atol sa maong panghitabo.
Nalambigit sa panagbangga ang usa ka Nissan van nga adunay plate No. KAD 1032 ug ang Meat Van nga adunay plate No. KAO 5041.
Subay sa report sa kapulisan, alas singko pasado ang takna kaganihang buntag, nahitabo ang panagbangga sa duha ka mga Van nga ang ang Meat Van gimaneho ni Kent Lenoel Sugabo Subugon, 23-anyos samtang ang van ang gimaneho ni Klein Sarigumba Arabejo, 29 -anyos nga susamang residente sa dakbayan sa Davao.
Sa imbistigasyon sa kapulisan, nasayran nga nagbyahe ang duha ka mga sakyanan sa managlahing direksyon sa dalan sa Davao Bukidnon National Highway Barangay Marilog Proper, Marilog District,ning syudad apan sa paglatas niini sa maong dalan sumala pa sa drayber sa van nga ang kasugat niini nga van nisubay sa iyahang dalan, tungod niini iyahang gisulayan sa paglikay ug niadto kini laing dalan, apan ang Meat Van nibalik sa iyahang gisubay nga dalan ug niadtong tungura wala na sumapa pa siya’y nahimo ug nahitabo gayud ang panagbangga.
Gumikan sa maong panghitabo, ang kauban sa drayber sa van ang naipit sa front seat nga bahin nga dali sab kining gitanggal sa miresponding 911 ug nakaangkon ug hilabihang bun-og sa kalawasan.
Samtang ang duha ka mga drayber ug laing tulo ka mga sakay sa duha ka mga sakyanan ang nakaangkon lamang ug gamay’ng bun-og sa ilahang kalawasan gumikan sa maong panghitabo.
Sa gihimong paghinabi sa kapulisan sa drayber sa Meat Van, iyahang giangkon nga nakatulog sumala siya niadtong tungura.
Sa karon, padayon pa nga gina-obserbahan ang naipit nga pasahero tungod sa nasampit nga panghitabo.
