Walay dali nga solusyon sa grabeng pagbaha nga nasinati sa pipila ka bahin sa Luzon tungod sa padayon nga pag-ulan nga dala sa Habagat.
Mao kini ang pahayag ni Department of Public Works and Highways (DPWH) Secretary Vince Dizon, human sa halapad nga pagbaha sa pipila ka lugar sa Metro Manila ug ubang bahin sa Luzon.
Matud pa ni Dizon, dili dayon masulbad ang problema sulod lamang sa usa ka tuig maong gikinahanglan pa ang dugang solusyon ug hapsay nga pagpatuman sa mga proyekto sa tibuok nasud.
Nagpadayon ang imbestigasyon sa Office of the Ombudsman bahin sa mga kwestyonableng flood control projects.
Samtang gihulat ang resulta sa imbestigasyon, gipunting sa DPWH ang pag-ayo sa mga guba, wala mahuman ug gibiyaan nga mga proyekto nga unta makatabang sa pagkontrol sa baha.
Nanginahanglan og rescue ang pipila ka residente human misaka pag-ayo ang tubig-baha sa Barangay San Isidro, Parañaque City, diin migamit na ang mga residente og pisi isip giya samtang mitabok sa lawom nga baha, samtang miabot usab ang mga rescuer nga adunay dala nga rescue boats.
Migrabe usab ang traffic congestion sa Sucat, Parañaque tungod sa grabeng pagbaha. Dili na usab maagian sa mga sakyanan ang pipila ka bahin sa Zapote Junction ilawom sa Zapote Flyover. Mibalhin ngadto sa evacuation areas ang hapit 600 ka residente gikan sa Roxas District ug Barangay Bagong Silang sa Quezon City tungod sa pagsaka sa tubig-baha.
Sumala sa report,misaka hangtod dughan ang tubig sa pipila ka bahin sa Gumamela ug Waling-Waling Streets sa Roxas District maong mibalhin ngadto sa evacuation areas ang hapit 600 ka residente.
Gipangunahan sa rescuers ug lokal nga mga opisyal ang pag-evacuate sa mga bata, senior citizen ug persons with disabilities.
Sa pagka karun, nagpuyo sa temporaryong evacuation site sa Roxas Gymnasium ang 19 ka pamilya o mokabat sa 70 ka indibidwal.
Miabot usab sa 149 ka pamilya gikan sa Barangay Bagong Silang ang gi-report nga nangita og temporaryong kapuy-an tungod sa baha.
