Gipasiugda ni DPWH Secretary Vince Dizon nga adunay angay manubag sa dagkong kadaot nga gipasangil sa padayong pagbaha tungod sa pag-lapaw sa tubig sa Talomo River duol sa Taal Bailey Bridge sa Davao City niaging semana.
Atol sa iyang inspeksyon sa maong lugar sa adlawng Miyerkules sa buntag, Hulyo 29, gipangutana sa ahensya nganong wala gihapon masulbad ang maong problema bisan pa nahitabo na ang susamang pag-lapaw sa suba niadtong 2019, bisan bilyon ang pondo nga gigahin sa ahensiya alang sa maong proyekto.
Matod ni Dizon, magsugod na ugma ang pagpataas sa dike sa maong lugar.
Nadiskubrihan usab nga napulo ka tuig nang wala mahimo ang dredging sa suba, maong himuon kini nga usa sa mga prayoridad aron malikayan ang pagbalik sa pag-lapaw.
Plano usab sa ahensiya ang pagtukod og dam o detention basin sa mga kabukiran human nasuta nga dako ang epekto sa kusog nga ulan sa kataasan nga bahin sa lugar nga paingon sa siyudad.
Apan, gitun-an pa kini karon aron masiguro ang hustong pagpatuman.
Sa katapusan, gipasiguro sa ahensya nga himuon ang hugot nga imbestigasyon, apil ang pagsusi sa mga lakang nga gihimo sa lokal ug nasudnong tanggapan sa DPWH maytungod sa maong isyu.
