DAVAO CITY – Gipasalig sa Department of Public Works and Highways (DPWH)-Davao nga hulipan nila ang nawala nga mga bolts sa San Rafael Bridge sa Ma-a ning siyudad aron masiguro ang kaluwasan sa mga motorista.
Kahinumduman nga adunay nanawagan sa ahensiya nga mopahigayon ug inspeksiyon human nga ilang namatikdan ang pagkawala sa nahisgutan nga bolt sa tulay.
Sumala pa kang DPWH-Davao spokesperson Dean Ortiz nga nagpadala na sila og mga personahe sa ilang buhatan aron mosubay sa tulay ug nakumpirma nga gikawat ang mga bolts niini.
Gipasalig sa opisyal nga ilisan gilayon kini sa hinanali nga panahon.
Migula sa inisyal nga imbestigasyon nga gituyo pagtangtang ang bolt sa tulay.
Gitataw sab sa DPWH nga responsibilidad sab sa mga barangay officials diin nahimutang ang tulay nga bantayan kini aron nga dili na subling mahitabo ang susama nga insidente.
