Gipaspasan sa Department of Public Works and Highways o DPWH ang rehabilitation works sa apektadong bahin sa Davao–Bukidnon Road sa Sitio Marahan, Barangay Marilog Proper, Davao City, usa ka bulan human nahitabo ang road slip sa maong lugar.
Sulod sa miaging bulan, nahuman na ang installation sa sheet piles samtang nagpadayon ang preparatory works alang sa permanent ground anchors aron mapalig-on ang road section.
Sa pagkakaron, usa ka lane ang passable alang sa light vehicles, public utility buses, ug mga sakyanan nga dili molapas sa 10 tons o two-axle trucks.
Gipahimangnoan usab ang mga motorista nga mahimong temporaryong sirad-an ang dalan depende sa ginahimong trabaho, ilabi na kung kinahanglan gamiton ang heavy equipment nga makababag sa agianan.
Giawhag sa DPWH ang mga motorista nga mosunod sa traffic personnel ug padayon nga mag-monitor sa official advisories alang sa updates sa road condition ug traffic flow.
Gipaspasan ang mga trabaho subay sa direktiba ni President Ferdinand R. Marcos Jr. aron mapalig-on ang apektadong bahin sa kalsada ug mapabalik ang normal, luwas, ug hapsay nga pagbiyahe sa Davao–Bukidnon Road, samtang nagpadayon ang monitoring sa kahimtang sa lugar panahon sa construction.| VIA BOMBO EROS PAJOTA
