DAVAO CITY – Paningkamutan karon sa buhatan sa Department of Public Works and Highways (DPWH) 11 nga matapos ang ilang mga proyekto sa gitakda nga panahon luyo sa pagkuyanap sa Corona Virus Disease (Covid-19).
Sa kasamtangan, pabilin sumala pa normal ang operasyon sa ahensiya apan istrikto nila nga gipatuman ang mga sumbanan sa ilang mga empleyado ilabi na sa mga nagpatuman ug konstruksiyon sa proyekto.
Sumala pa kang Dean Ortiz, tigpamaba sa DPWH-11, walay gipatuman karon nga pagsuspende sa ilang mga proyekto apan aduna sumala pay pipila sa ilang empleyado ang apektado sa gipatuman nga lockdown sanglit gikan kini sa mga kasikbit nga siyudad sa rehiyon.
Hinuon gikanayon ni Ortiz nga minimal effect lamang kini ug magpadayon pa gihapon sila sa ilang operasyon ug aduna na sab silay gi-andam nga mga alternatibong mga plano.
