DAVAO CITY – Dungan sa pag-isyu ug EO 59 o modified liquor ban ug pagtapos sa curfew hour sa dakbayan sa Davao, nagpahimangno pa gihapon ang ahensiya sa Department of Health 11 ngadto sa mga Dabawenyos ng hugtanon pa gihapon nga motamud sa minimum public health standards (MPHS) ilabi na nga nagsingabot na sab ang Christmas season.
Sumala pa kang Dr. Raquel Montejo sa Department of Health Davao Region, bisan nga miubos na ang kaso sa Covid sa dakbayan ingon man hospital bed capacity sa siyudad, kinahanglan pa gihapon nga palig-onon ang MPHS ug pakusgan pa ang vaccination.
Kahinumduman nga unod sa EO 59 ang pag-ban sa pagpamaligya ug alak pagsulod sa ala una sa kaadlawon hangtud alas otso sa buntag matag adlawa.
Wala pa sab gitugtan karon ang pag-serve ug alak sa mga bars, restaurants, sari-sari stores, palengke videoke, ug uban pang business establishments ingon man pag-inom ug alak sa tanan nga mga pampublikong lugar sa mga kadalanan, alleys, pathways, ug gawas sa mga gate.
Mamahimo lamang sumala pa nga mag-inom sa sulod sa private properties. Una ng gipailalom ang dakbayan sa Davao ilalom sa Alert Level 3 sugod sa Oktubre 20 hangtud na sa Oktubre 31.
