Target sa Department of Energy (DOE) nga ma-award ang centralized auction para sa mga mid-merit natural gas power plant sa ika-upat nga quarter sa 2026 isip kabahin sa paningkamot sa gobyerno nga mapalig-on ang suplay sa kuryente sa Pilipinas.
Nagkanayon si Energy Secretary Sharon Garin nga nakig-coordinate na ang DOE sa nagkalain-laing ahensya ug sa Independent Electricity Market Operator of the Philippines (IEMOP) aron maandam ang bidding process.
Tumong sa maong programa nga mapadasig ang pagtukod ug pagpalapad sa mga natural gas power plant nga mahimong gamiton panahon sa taas nga panginahanglan sa kuryente.
Gipasabot sa DOE chief nga mas paspas motubag ang natural gas power plant kumpara sa coal-fired power plant, hinungdan nga makatabang kini sa pagpugong sa kakulang sa suplay sa kuryente ilabi na panahon sa peak hours o grabe nga konsumo.
Gipahibalo usab niya nga mas taas lang hinuon ang gasto sa paggamit sa natural gas kumpara sa coal. Gawas sa natural gas, gipadali usab sa DOE ang pagpatuman sa mga renewable energy projects.
Lakip niini ang Green Energy Auction 8 nga nakatutok sa mga proyekto sa Mindanao, ug ang Green Energy Auction 9 nga alang sa solar-on-stilts ug agrisolar projects.
Gipahayag sa DOE nga ilang giandam pa ang gikinahanglan nga mga kasabutan uban sa Department of Agriculture aron masiguro ang hapsay nga pagpatuman sa maong mga proyekto.
