Gidepensahan sa Department of Foreign Affairs ang provisional agreement tali sa Pilipinas ug China kabahin sa Rotation and Resupply (RORE) missions ngadto sa BRP Sierra Madre sa Ayungin Shoal.
Matud sa DFA, gihimo ang kasabutan nga wala gikompromiso ang 2016 Arbitral Award nga nagpalig-on sa sovereign rights ug hurisdiksiyon sa Pilipinas sulod sa Exclusive Economic Zone.
Giklaro sa ahensya nga ang arrangement limitado lamang sa pagdumala sa rotation ug paghatod sa importanteng suplay ngadto sa BRP Sierra Madre ug dili kini nagpasabot nga gibiyaan sa Pilipinas ang iyang legal nga katungod sa lugar.
Gipunting usab sa DFA nga 15 na ka RORE missions ang nahimo nga walay insidente pinaagi sa koordinasyon sa Armed Forces of the Philippines ug Philippine Coast Guard.
Gitubag usab sa ahensya ang mga kritisismo batok sa maong arrangement ug giingong gisusi na sa gobyerno ang ubang opsyon sama sa airdrops, drones ug fast boats.
Sa pagkakaron, wala matud pa’y intensiyon ang DFA nga usbon ang maong arrangement, samtang ang pagpadayon sa implementasyon niini gitugyan sa security sector.
