Nanawagan ang Department of Education (DepEd) sa Philippine National Police (PNP) ug uban pang law enforcement agencies nga palig-onon ang pagpatuman sa gun safety measures human sa insidente sa pagpamusil nga nalambigit sa usa ka menor de edad sa General Santos City, diin naangol ang usa ka 9-anyos nga estudyante human aksidenteng mibuto ang .38-caliber nga pistola samtang nagdula kini uban sa iyang 13-anyos nga higala sulod sa usa ka balay.
Sumala kang Education Secretary Sonny Angara, nagpakita ang maong insidente sa makapabalakang padron sa pagkaladlad sa mga kabatan-onan sa armas ug sa nagkadaghang kaso sa kapintasan nga nalambigit sa mga menor de edad.
Lakip niini ang insidente sa Las Piñas City diin aduna usab usa ka 13-anyos nga estudyante ang namatay human gidunggab, nga giingong tungod sa panaglalis bahin sa ₱10 nga kambyo. Gihisgutan usab ni Angara ang pagpamusil sa Tacloban kaniadtong Hunyo 2026 nga mikalas sa kinabuhi sa tulo ka estudyante
Gipasiugda ni Angara nga ang hustong pagtago sa armas dili lamang legal nga obligasyon kondili moral usab nga responsibilidad aron malikayan ang susamang mga trahedya.
Gihangyo sa DepEd ang PNP nga hugtan ang pagpatuman sa gun safety laws pinaagi sa mas estriktong background checks sa mga tag-iya og armas, regular nga inspeksyon sa pagtipig sa lisensyadong armas, ug mas kusog nga kampanya batok sa ilegal nga armas.
Dungag pa, kinahanglan tudloan sa mga ginikanan ug guardian ang mga bata nga dili mohupot og armas, pasabton ang peligro nga dala niini, ug dayong mosumbong sa mga hamtong kung makakita sila og armas.
Gisubli sa DepEd ang zero-tolerance policy batok sa pagdala og armas, bala, hinagiban, ug pabuto sulod sa mga tulunghaan. Ubos sa National Policy Framework on Learners and Schools as Zones of Peace, giila ang mga eskwelahan isip “zones of peace” diin ang mga estudyante adunay katungod sa espesyal nga panalipod ug dili mahimong target sa bisan unsang matang sa kapintasan.
Gumikan niini, gipasidan-an usab ang mga eskwelahan nga hugtan ang security protocols, magpatuman og inspeksyon ug regular nga risk assessment, ug ireport dayon sa PNP ang bisan unsang ilegal nga armas nga madiskobrehan.
