Nagpahigayon ang Department of Education (DepEd) og school safety drill aron maandam ang mga estudyante ug magtutudlo sa hustong buhaton kung adunay insidente sa kapintasan sulod sa mga tulunghaan. Tumong sa programa nga mapalig-on ang kaluwasan sa mga eskwelahan sa Pilipinas.
Gisugdan sa DepEd ang National Safe Schools Summit and Safety Drill sa Manila Science High School, diin kapin sa 1,700 ka mga estudyante gikan sa Grade 7 hangtod Grade 12 ang misalmot.
Sa maong drill, gipakita ang nagkalainlaing sitwasyon ug ang hustong mga lakang nga angay buhaton sa mga estudyante ug magtutudlo kon adunay armadong tawo o active shooter nga mosulod sa eskwelahan.
Sumala ni Education Secretary Sonny Angara, nakigtinabangay na ang DepEd sa Philippine National Police (PNP) ug sa mga regional office aron regular nga ipahigayon ang maong safety drill sa private ug public schools.
Sa pilot drill, namatikdan sa mga security expert nga bisan hapsay ang pagtubag sa mga partisipante, adunay pipila nga nagduha-duha ug dali nga gikapoy.
Tungod niini, gipasiugda nga importante ang kanunay nga pagbansay aron masiguro ang paspas ug husto nga pagtubag sa panahon sa emerhensiya.
Gihisgutan usab ni Secretary Angara ang nagkadakong hulga gikan sa internet, lakip ang bayolente nga video games, online groomers, ug mga grupong nag-awhag og kapintasan.
Partikular niyang gihisgutan ang online game nga GoreBox, ug giingong abli ang gobyerno sa posibilidad nga pahugtan o i-bawal kini kon mapamatud-ang makadaot kini sa kabatan-onan.
Plano usab sa DepEd nga mangayo og dugang pondo sa Kongreso aron makahire og mga propesyonal nga security guard ug makapalit og handheld metal detectors alang sa liboan ka pampublikong eskwelahan sa tibuok nasod.
