Giingong panahon na alang sa legal team ni Vice President Sara Duterte nga pamatud-an ang ilang giangkon nga adunay hulga sa kinabuhi sa Bise Presidente, nga maoy ilang gipasikaran sa mga kontrobersiyal nga pahayag batok kang Pangulong Ferdinand Marcos Jr. ug ubang opisyal.
Sumala ni human rights lawyer Atty. VJ Topacio, kanunay nga gipasangil sa kampo ni Duterte nga adunay hulga sa iyang kinabuhi, lakip na ang ilang depensa sa kontrobersiyal nga Zoom press conference kaniadtong Nobyembre 23, 2024.
Gikanayon usab ni Topacio nga apil sa ilang gihisgutan ang kontrobersiyal nga Project Romanov, diin giingong adunay hulga usab sa kinabuhi sa mga suod nga kabanay ni VP Sara.
Bisan pa man, matud ni Topacio, lahi ang orihinal nga konteksto sa Project Romanov nga unang gihisgutan ni Davao City Mayor Baste Duterte, apan daw gigamit kini sa kampo sa Vice President aron palig-onon ang ilang pag-angkon nga adunay dakong hulga sa iyang kinabuhi.
Dugang pa niini, adunay higayon ang kampo ni Duterte sa umaabot nga semana nga pamatud-an ang ilang mga gipang-angkon, samtang pagahisgutan ang grave threat article sa impeachment trial.
Kung adunay lig-on nga basihan ang maong alegasyon, angay usab kini nga imbestigahan sa mga Philippine authorities pinaagi sa mga law enforcement agencies.
Samtang, nagtuo si Atty. Topacio nga tinguha sa prosecution nga mapalig-on ang ilang pag-angkon nga ang mga hulga ni Duterte kabahin sa usa ka pattern, maong iprisentar pa nila si National Bureau of Investigation Director Melvin Matibag sa katapusang mga adlaw sa pagdungog nga gitagana alang sa grave threat article.
Gibarugan usab ni Topacio nga lisod mapapas sa kampo ni Vice President Sara Duterte ang maong pattern bisan pa man sa paningkamot sa ilang PR team nga mapauswag ang imahe sa bise presidente.
