DAVAO CITY – Wala pay nadawat nga Command Memorandum Circular ang Davao City Police Office (DCPO) gikan sa ilang central office sa Philippine National Police (PNP) kalabot sa tukma nga mga giya ug sumbanan nga huptan sa mga police personnel kalabot sa re-launch sa anti-drug campaign.
Kahinumduman nga gilunsad karon bag-ohay lamang sa PNP ang modified anti-drug campaign nga gitawag nila ug “Project Double Barrel: Reloaded” nga ilalom sa pagdumala sa bag-ong PNP anti-drug department, Philippine Drug Enforcement Group.
Segun ni DCPO spokesperson Police Senior Inspector Catherine dela Rey, andam sila nga i-comply kung unsa man ang mga sumbanan nga ipadala kanila sa ilang central office.
Hinuon gitino sa opisyal nga nakadawat na sila ug direktiba kaniadtong Marso 4 gikan sa PNP headquarters nga mihatag kanila ug go signal nga magpahigayon ug anti-illegal drug operations sa mga personalidad nga mihimo ug mga aktibidad nga supak sa balaud.
Gilunsad sa DCPO ang kampanya batok illegal nga droga uban ang kamugnaa sa City Drug Enforcement Unit (CDEU).
