Gitakda sa Trial Chamber III sa International Criminal Court (ICC) ang unang status conference sa kaso ni kanhing Pangulong Rodrigo Duterte karong Mayo 27, isip kabahin sa pagpadayon sa pagtaral.
Sumala sa ICC, gimanduan ang prosekusyon ug depensa nga mosumite sa ilahaang tagsa-tagsa ka dokumento ug ebidensya sa dili pa ang deadline nga Mayo Kinse.
Lakip niini ang trial briefs, pagbutyag sa mga materyales, ug uban pang importanteng detalye alang sa kaso.
Tumong sa status conference ang pagtino sa timetable o iskedyul sa mismong trial, ingon man ang sunod nga mga lakang sa proseso.
Una nang gikompirma sa Pre-Trial Chamber I ang tulo ka ihap sa crimes against humanity batok kang Duterte, hinungdan nga napadulong ang kaso ngadto sa trial phase.
Kabahin niini, mas pormal nang sugdan sa ICC ang pagdungog sa kaso sa kanhing pangulo, nga karon anaa sa kustodiya sa The Hague sukad pa niadtong Marso 2025.
