DAVAO CITY – Wala pa gihapo’y matudlo nga suspek sa pagbanhig kang ARMM Second District Assemblyman Sidik Amiril nga gi-ambus niadtong Lunes sa hapon sa Buhangin, ning dakbayan sa Davao.
Sumala pa kang Police Senior Inspector Maria Teresita Plaza Gaspan, tigpamaba sa Davao City Police Office nga nagpahigayon pa ug reenactment ang Special Investigation Task Group Amiril sa crime scene aron nga matan-aw kung paunsa gipaulanan ug mga bala ang sakyanan sa Assemblyman.
Kahinumduman nga patay sa ambus ang helper ni Amiril nga si Vergie Atas.
Gipaabot pa sa Davao City Police Office ang trajectory examination sa SOCO aron nga masayran lamang ang entry ug exit point sa mga bala nga miigo sa sakyanan.
Siyam ka mga baseyo sa bala ang na-recover sa SOCO sa Crime Scene ug gipailalum sa ballistic test aron nga masayran ang gigamit nga kalibre sa mga armas.
Nasayran nga pipila ka higayon sab nga nahimong target sa Philippine Drug Enforcement Agency (PDEA) Operation si ARMM Assemblyman Sidik Amiril.
