DAVAO CITY – Nanawagan ang Davao City Social Welfare and Development Office kon CSWDO nga likayan ang paghatag sa mga indibidwal, pamilya ug mga bata nga nanglimos sa mga kadalanan.
Gikanayon sa administrative officer sa buhatan nga si Julie Dayaday, ang paghatag ug limos sa mga nahisgutan, adunay katugbang nga penalty o silot ilawom sa Presiential Decree No. 1563 Anti-Mendicancy Law.
Sumala pa sa maong balaod, dili tabang ang paghatag ug limos. Hinuon, mudugang kini sa mga ihap sa aksidente ug kriminalidad ilabi na sa mga bata.
Matud pa, usa kini nga pagkunsinte kanila aron di na mangiskwela ug manginabuhi, ug mamahimong kultura na lamang nila nga magsalig sa mga limos nga gihatag.
Namatikdan sa ahensya karon ang ubay ubay nga pagdaghan sa mga makililimos sa kadalanan sa dakbayan. Hinuon, mamahimo gihapong makatabang kanila sa mas luwas nga paagi.
Busa nag-awhag karon ang buhatan alang sa buot maghatag nga kontaka ang City Social Welfare and Development Office – Davao Facebook page alang sa dugang kasayuran.
via || Bombo LJ Florendo
