DAVAO CITY – Mupaabot og tabang pinansyal ang lokal nga kagamhanan sa Dabaw ngadto sa mga nabiktima sa pagtay-og sa yuta sa Itbayat, Batanes niadtong Hulyo 27.
Kini human nga giaprubahan sa mga miyembro sa 19th Davao City Council ang resolusyon nga nagtumong nga muhatag og financial assistance nga nagkantidad og usa ka milyon ka pesos (P1 million) ngadto sa mga apektadong residente sa Itbayat.
Ang maong pondo pagakuhaon gikan sa Quick Response Fund sa lungsod sa Dabaw.
Sumala kang Davao City Disaster Risk Reduction Management Office (CDRRMO) head Alfredo Baloran nga ihatag ang maong tabang nga pinansyal sa munisipalidad sa Itbayat nga maoy grabeng naapektohan sa nahisgutang linog.
Nasayran nga adunay 1,025 ka mga pamilya ang apektado sa maong 5.9 magnitude nga linog samtang aduna sab 180 ka mga panimalay ang nangaguba gumikan sa maong pagtay-og sa yuta nga miigo sa upat ka barangay .
Dugang sab ni Baloran nga personal nila nga ihatag ang maong cash assistance sa labing dali nga panahon aron nga makatabang alang sa pagtukod sa mga kabalayan sa maong dapit.
