Nangulo si Major General Alvin Luzon, Commander sa 10th Infantry (Agila) Division, sa usa ka aerial Rapid Damage Assessment and Needs Analysis o RDANA niadtong Hunyo 9 sa mga lugar nga grabeng naapektuhan sa linog sa Jose Abad Santos ug Balut Island sa Davao Occidental.
Kauban sa assessment ang mga representante gikan sa Office of Civil Defense, Department of Social Welfare and Development, Provincial Disaster Risk Reduction and Management Office sa Davao Occidental ug mga lokal nga panggamhanan, nga nagpakita sa lig-on nga koordinasyon sa mga ahensya sa gobyerno sa pagtabang sa mga apektadong komunidad.
Ang maong kalihokan kabahin sa nagpadayon nga humanitarian assistance ug disaster response operations sa Agila Troopers sa General Santos City ug ubang apektadong lugar diin padayon ang search and rescue operations, damage assessment, route clearing ug suporta sa mga lokal nga panggamhanan ug kaabag nga mga ahensya.
Isip kabahin sa padayon nga mga paningkamot sa pagresponde, usa ka Black Hawk helicopter sa Philippine Air Force ang gigamit sa air casualty evacuation o CASEVAC sa upat ka naluwas nga residente gikan sa Balut Island aron madala dayon sila sa angay nga medikal nga pasilidad.
Gikanayon ni Major General Luzon ang importansya sa panaghiusa ug koordinadong aksyon sa panahon sa kalamidad.
Matud niya, prayoridad nila ang kaluwasan ug kaayohan sa mga komunidad nga naapektuhan sa linog ug padayon silang motabang hangtod makabangon ang mga biktima gikan sa epekto niini.
Dugang pa niya, nagdeploy usab sila og dugang nga Agila Troopers ngadto sa mga grabeng apektadong barangay sa Davao Occidental, ilabina sa mga lugar nga dili pa maagian sa sakyanan aron masiguro nga makaabot ang ayuda sa mga nanginahanglan.
Gipasalig sa 10th Infantry Division nga magpadayon kini sa pagsuporta sa mga kalihokan sa gobyerno alang sa disaster response ug recovery efforts.
