Mipasaka og pormal nga protesta ang Pilipinas batok sa China kabahin sa nadiskobrehang “floating structure” duol sa Bajo de Masinloc o mas nailhan nga Scarborough Shoal.
Sumala sa Department of Foreign Affairs, gikumpirma sa gobyerno nga nakapahigayon na kini og diplomatic protest ug mga demarche batok sa presensya sa maong estruktura nga namatikdan duol sa lagoon nga gigamit sa mga Pilipinong mananagat.
Gitaho usab sa militar sa Pilipinas nga namatikdan sa mga eroplano sa Air Force ang estruktura nga adunay pipila ka mga tawo sa ibabaw ug daw adunay antena, maong gipakusgan pa ang pagbantay sa lugar.
Sumala sa mga opisyal, nabalaka ang gobyerno nga mahimo kining unang lakang ngadto sa mas lapad nga presensya sa China sa maong lugar, susama sa giingong mga reclamation ug pagtukod og militarisadong mga pasilidad sa rehiyon kaniadto.
Kahinumdoman nga dugay nang giangkon sa China ang halos tibuok West Phil. China Sea bisan pa sa desisyon sa international tribunal niadtong 2016 nga nag-ingon nga walay legal nga basihan ang ilang mga pag-angkon.
Sa laing bahin, hugot usab nga gipanghimakak sa Chinese Embassy sa Manila ang mga alegasyon ug giingong kabahin sa ilang soberanong teritoryo ang maong lugar ug adunay sila’y katungod sa pagpahigayon og mga kalihokan sama sa scientific research sa maong shoal.
