Mas mapalapdan ang akses sa cancer treatment sa Mindanao human andamon sa We Hope Medical Group ang pag-abli sa ilang unang chemotherapy center sa isla.
Ang Davao Chemotherapy Center gilauman nga makatabang ilabina sa mga pasyente sa Davao City ug kasikbit nga mga probinsya nga naglisod sa pagpangita og pasilidad alang sa ilang pagtambal.
Pinaagi sa pakigtambayayong sa PhilHealth ug mga local government unit o LGU, gipaabot nga adunay libreng chemotherapy treatment alang sa mga kwalipikadong benepisyaryo.
Matud sa grupo, tumong niini nga maminusan ang dakong gasto sa cancer treatment ug malikayan nga mapugos ang mga pamilya sa pag-undang sa pagtambal tungod sa pinansyal nga kalisod.
Ang kakulang sa chemotherapy centers sa pipila ka bahin sa Mindanao maoy hinungdan nga daghang pasyente kinahanglan pa mobiyahe og layo aron makadawat og serbisyo.
Ang bag-ong pasilidad nga nahimutang sa Ground Floor sa Filandia IT Center, Jacinto Extension corner Quirino Avenue, Barangay 11-B, Davao City, gitumong nga maghatag og mas duol ug mas sayon nga access sa specialized cancer care.
Matud ni Dr. John Paul Aclan sa We Hope Medical Group, ilang tumong nga walay Pilipino ang mapugos pagpili tali sa panginabuhi ug kinahanglanong pagtambal batok sa kanser. | VIA BOMBO EROS PAJOTA
