DAVAO CITY – Walay natalang major damages sa mga imprastraktura sa dakbayan sa Davao dungan sa nahitabong magnitude 5.6 nga linog alas 4:23 kagahapon sa hapon diin ang sentro niini ang anaa sa Magsaysay Davao del Sur.
Nasayran nga ang syudad sa Davao ang nakasinati og intensity 5.
Sa pakighinabi sa Bombo Radyo Davao kang Alfredo Baloran, Operations Head sa City Disaster Risk Reduction and Management Office (CDRRMO), gikumpirma niini nga subay sa gipahigayong assesment kaganihang buntag, walay reported nga mga major damages sa syudad gawas lamang sa namatikdang minor cracks sa overpass sa Matina Crossing.
Kahinumduman nga temporaryong gipasirad-an ang maong imprastraktura ayha paman ang pagpahigayon og assessment sa mga structural engineers aron madetermina ang integrity sa maong impastruktura kung naa pa ba kini kapasidad o kinahanglan ba kining i-repair.
Hinoon, gilayong nakig-coordinate ang buhatan sa City Engineers Office kagahapong adlawa. Ning kasamtangan, gapaabot pa og abiso ang CDRRMO kung mamahimo na bang ablihan ang overpass alang sa publiko.
Kahinumduman nga sa nakalabay nga pagtay-og sa yuta niadtong tuig 2019, una na sab nga gisirad-an ang maong imprastruktura human nga naka-angkon sab kini og mga liki-liki.
Sa pikas bahin, subay sa continous monitoring sa buhatan, walay nadawat nga report gikan sa mga tulonghaan ning syudad kung aduna bay natala nga mga kadaut sa mga building ug classrooms dungan sa nahitabong pagtay-og kagahapong adlawa.
Dugang pa sa opisyal nga nagpadayon ang ilang mga aktibidad sama sa orientation ilabi na sa mga earthquake prone areas sama sa mga high rise condominiums ug uban pa.
Nagpahimangno na lamang ang opisyal ngadto sa katawhan nga kanunay himoon ang mga nakat-onan sa mga drills ug dili magpanic aron malikayan ang mas dakong risgo atol sa linog.
