DAVAO CITY – Patay ang usa ka pedestrian human nga nabanggaan og sakyanan pasado alas siyete ang takna kagabii.
Subay sa report sa San Pedro Police Station, giila ang biktima nga si Ira Gan Mendoza, 31 -anyos, dalaga ug residente sa Block 51 Lot 14 Deca Homes, Mulig, Toril Dist. ning syudad sa Davao.
Sa inisyal nga imbistigasyon sa kapulisan, nitabok sumala pa ang biktima sa karsada atubangan sa GD Builders sa F. Dizon Road, Brgy. 19-B, ning dakbayan.
Apan, kalit kining nabanggaan sa usa ka multicab nga gimaneho ni John Michael M. Doromal nga padulong sa Carlos P. Garcia Highway.
Tungod sa kakusog sa pagkabangga nalagpot pa ang biktima sa kilid nga bahin sa karsada ug nakaangkon ug mga bun-og sa iyahang kalawasan nga maoy nahimong hinungdan sa hinanaling kamatayon niini.
Samtang nabangag sab ang windshield nga bahin sa Multicab nga adunay rota nga El Rio.
Dali nga girespondehan ang biktima sa Brgy. 19-B, Responders ug gidala sa SPMC. Apan sumala pa sa otoridad, pagka-alas dos ang takna kaganihang kaadlawon ang biktima nakabsan na sa iyahang kinabuhi.
Sa pagkakaron igo na lamang sa pagbangutan ang kabanay sa biktima.
Samtang ang drayber ang anaa karon sa San Pedro Police Station.
