Nakahiagom og grabeng kadaot ang usa ka dakong ospital sa Beersheba, habagatang Israel human direktang naigo sa Iranian missile strike.
Matud sa emergency service sa Israel nga ang naigo sa ospital mao ang Soroka Medical Center, diin kapin sa 30 ka mga tawo ang nasamdan.
Gikumpirmar usab sa Presidente sa Israel nga si Isaac Herzog nga ang missile sa Iran naigo sa ospital, nga gipunting ang mga sibilyan.
Sa bag-ong balud sa mga pag-atake sa missile sa Iran kaniadtong Huwebes, ang Israel’s emergency service nga Magen David Adom (MDA) nagtaho nga labing menos 65 ka mga tawo ang naangol.
Diin tulo ka mga biktima ang anaa sa grabeng kahimtang, lakip ang usa ka 80 anyos ug duha ka lola nga nagpangidaron og 70 anyos.
Samtang ang duha ka mga biktima anaa sa kasarangan nga kondisyon ug 42 ka mga tawo ang nakahiagum og minor injuries sa mga shrapnel ug mga pagbuto.
Laing 18 usab ka mga indibidwal ang nasamdan samtang nagpaingon sa usa ka bomb shelter.
Sumala sa mga grupo sa MDA, ang mga nasamdan nakadawat og medikal nga pag-atiman ug ang mga biktima gibakwit sa mga ospital.
Sa Iran, gipahibalo sa militar sa Israel nga gipunting niini ang mga nuclear sites lakip ang Arak heavy water reactor ug ang pasilidad sa Natanz.
Gilusad sa Israel ang strike human giaprobahan ni US President Donald Trump ang mga plano sa pag-atake sa Iran apan wala pay pinal nga desisyon kon atakehon ba ang Islamic Republic.
Sa sayo pa, gihulga ni Iranian Supreme Leader Ayatollah Ali Khamenei si Trump sa iyang nasudnong pakigpulong sa “dili mamaayo nga kadaot” kung mangilabot ang Amerika sa ilang away batok sa Israel.
