Personal nga mibisita si Pangulong Ferdinand “Bongbong” Marcos Jr. sa General Santos City aron maghatag og tabang sa mga biktima sa linog. Gikumpirma usab sa Malacañang nga mokabat sa P100 milyon ang kantidad sa ayuda ug suporta nga gihatag sa nasudnong gobyerno alang sa mga apektadong residente ug komunidad. Giingon usab niini, nga padayon ang paghatag sa gobyerno og tabang aron masiguro ang dali nga pagbangon sa mga pamilyang naapektuhan sa maong kalamidad.
Gipasalig usab sa Pangulo nga dili lamang ayuda ang ihatag sa gobyerno kondili lakip usab ang suporta sa mental health sa mga estudyanteng naapektuhan sa kusog nga linog sa pipila ka bahin sa Mindanao, lakip na sa Sarangani ug General Santos City. Gibutyag sa Pangulo ang kamahinungdanon sa pag-atiman sa emosyonal ug sikolohikal nga kahimtang sa mga kabatan-onan, ilabina sa mga estudyanteng mahimong nakaagom og trauma tungod sa maong linog.Dugang pa, adunay mga programa ang Department of Health o DOH aron matabangan ang mga estudyante sa pag-atubang sa ilang nasinati ug sa pagbangon gikan sa emosyonal nga epekto sa kalamidad.
Dugang pa niini, giawhag sa Pangulo ang mga magtutudlo ug mga opisyal sa eskwelahan nga bantayang pag-ayo ang mga estudyanteng nagpakita og timailhan sa emosyonal nga kasakit ug grabeng kabalaka tungod sa nahitabo. Matud usab sa Pangulo, dili tanang bata komportable nga makapadayag sa ilang gibati ug kasinatian human sa usa ka dakong kalamidad.
Aron mapalig-on pa ang suporta sa mga eskwelahan, gibutyag usab sa Pangulo nga pagabansayon ang mga magtutudlo aron mas dali nilang mailhan ug matabangan ang mga estudyanteng nakaagom og trauma ug grabeng stress. Sa kasamtangan, padayon ang koordinasyon sa mga ahensya sa gobyerno aron masiguro nga matubag dili lamang ang pisikal kondili usab ang mental ug emosyonal nga panginahanglan sa mga biktima sa linog.
