DAVAO CITY – Gihingusgan karon ni Dr. Ashley Lopez, hepe sa Davao City Health Office, nga dili pa angayang tanggalon ang mandatoryong pagsul-ob sa facemask ilabi na sa mga pampublikong lugar.
Kini mismo ang gibutyag ni Lopez ilabi pa nga aduna pa gihapoy mga natalang kaso sa COVID-19 diri sa syudad. Dugang pa sa opisyal, isip proteksyon sa kaugalingon ug sa tibouk katawhang dabawenyo, mas maayong ipabilin ang pagsul-ob sa facemask isip kabahin sa minimum public health standards aron makalikay sa maong makamatay nga sakit. Gawas niini, gipaklaro sa opisyal nga nagpabilin pa gihapon hangtud ning kasamtangan ang hulga sa Covid-19 diri sa dakbayan.
Kahinumduman nga una na sab nga gikanayon ni Davao City Mayor Sebastian Duterte nga magpaabot lamang kini sa mando sa DOH mahitungod sa ipatumang protocols sa syudad. Subay niini, pabiling hugot nga ipatuman ang “Wearing of Facemask Ordinance” ilabi na sa lugar nga sagad anaa ang panagtapok sa mga tao.
