DAVAO CITY – Gitino sa usa ka health official nga ang pagdagsa sumala pa sa populasyon dinhi sa dakbayan ang hinungdan sa pagsaka sa ihap sa mga nataptan sa Human Immunodeficiency Virus (HIV).
Kahinumduman nga dungan sa pagsaulog sa World AIDS Day, gibutyag ni Dr. Jordana Ramittere, head sa Reproductive Health and Wellness Center (RHWC) nga aduna sumala pay pipila ka mga indibidwal ang gikan sa lain nga lugar ug dinhi lamang sa dakbayan mipailalom sa eksaminasyon.
Kahinumduman nga ang Davao Region ang anaa sa ika-lima sa nasod nga adunay pinakadaghan ug kaso sa HIV.
Una ng gibutyag sa Department of Health (DOH) nga anaa sa 3,476 HIV cases ang natala sa rehiyon atol sa first half ning kasamtangan nga tuig. Diin kinatibuk-ang 2,902 ang naggikan dinhi sa dakbayan sa Davao.
Nasayran sab gikan kang Ramittere nga mayorya sa populasyon nga nakaangkon og HIV mao ang mga lalaki diin ang edad anaa sa 15 ngadto na sa 34 anyos.
Gikanayong ang nahisgutan nga grupo ang gikonsidera isip reproductive age.
Sa kasamtangan, gipalig-on pa sa RHWC ang ilang information campaign ilabi na nga gikinahanglan karon ang edukasyon aron nga matabangan ang mga health sectors sa pagpakatag og impormasyon kalabot sa HIV.
Samtang nanghinaut na lamang si Maria Teresa Requillo, STI-HIV program manager sa DOH, nga unta dili na mosaka pa ang ihap sa mga indibidwal dinhi sa dakbayan nga makaangkon sa nahisgutan nga balatian.
