DAVAO CITY – Mas gipahugtan karon sa department of agriculture (DA) 11 ang ilang pakig-alayon tali sa mga local government units aron mababagan ug dili gayud makasulod sa rehiyon ang avian influenza o bird flu.
Nag-una nga gihimo sa nahisgutang buhatan ang padayon nga pagpahigayon ug surveillance ug monitoring sa nagkadiayang dapit sa region 11 uban sa mas pagpahugot pa sa boarder control aron masuta ang mga mosulod nga mga poultry products.
Gikanayon ni Dr Armie Capuyan, focal person sa ASF sa kasamtangan nagpabilin nga walay gikatala nga unsa mang kaso sa bird flu ang tibuok davao region ug nanghinaut kini nga dili makasulod ang nahisgutang sakit sa manok, pato, ug uban pang poultry products.
Nabalaka ang nahisgutang opisyal nga maapektuhan pag-ayo ang poultry industry sa davao region higayon nga makasulod ang bird flu sama sa nasinatian sa nakalabay nga mga katuigan sa dihang mikaylap ang ASF diin daghang mga negosyante sa hog industry ang naalkanse.
Tungod niini, nanawagan si Capuyan ngadto sa mga nanag-iya ug poultry sa rehiyon nga makig-alayon gilayon sa mga hingtungdang ahensiya sa gibyerno sa higayon nga masinatian ang pagkamatay sa ilang mga binuhing manok, pato, itik, gansa ug uban pa.
