DAVAO CITY – Gumikan kay daghanan ang moadto sa mga nagkadaiyang resorts dinhi sa dakbayan ilabi na karong panahon sa summer, pahugtan pa karon sa City Tourism Office Office (CTOO) ang pagmonitor sa mga resorts ilabi na kadtong walay gihuptan nga mga business permit.
Partikular nga gitumbok sa ahensiya ang mga resorts nga nahimutang sa mga hilit nga dapit sa dakbayan sama sa Marilog District diin daghanan matud pa sa tourism establishments ang walay igong mga dokumento.
Una ng gibutyag ni CTOO head Generose Tecson nga aduna silay inland resort nga na-isyuhan ug cease and desist order gumikan sa paglapas sa health protocols.
Gani aduna sab sumala pay milapas sa gitakda nga limit sama na lamang sa usa ka gambalay nga anaa sa kapin 60 ka mga guests ang namonitor nga sobra sa 25 guest limit alang sa mass gathering.
Aduna sab sumala pay nakalapas sa 24-hour liquor ban nga hugtanon nga gidili karon sa siyudad human nga nalugwayan ang pagpatuman niini hangtud sa Mayo 31 ning kasamtangan nga tuig.
Una na sab nga gibutyag sa opisyal nga moduso ug reklamo ang Business Bureau sa mga nanag-iya ug resorts nga nag-operate bisan nga walay igo nga business permit.
Samtang gikanayon sab sa opisyal nga dili pa makapagula ang ahensiya ug kamandoan sa tanan nga mga tourist guests nga magdala ug reverse transcription polymerase chain reaction (RT-PCR) test results sa higayon nga moadto o magpabilin sa mga tourists establishment sa dakbayan.
