DAVAO CITY – Sama sa milabay nga kapaskohan, laraw pa gihapon sa kagamhanang lokal nga magpahigayon ug mga programa sa bukid ilabi na sa mga lugar diin nanimuyo ang mga lumad.
Kini isip kabahin sa kasaulogan sa Pasko Fiesta sa siyudad.
Kahinumduman nga gikatakdang sugdan ang mga Christmas activities alang sa Indigenous Peoples (IP) communities sa Disyembre 2 ning kasamtangang tuig.
Laraw sumala pa niini nga dili na mokanaug dinhi sa patag ang mga lumad ug dili mabutang sa risgo ang ilang kinabuhi gumikan kay mamasko daplin sa kadalanan.
Una ng gibutyag ni City Social Services Development Office (CSSDO) Assistant head Marilyn Agonia, mismong ang iyang buhatan ang magdala og food packs, mobile library ug mopahigayon og parlor games alang sa Christmas parties.
Mas maayo sumala pa kung sa mismong komunidad na lamang sa lumad saulogon ang ilang pasko aron nga luwas ang mga nahisgutan.
Kahinumduman nga sa milabay nga katuigan, sagad mokanaug sa patag ang mga lumad aron nga mamasko hinungdan nga pipila sa mga nahisgutan ang magkasakit tungod sa kahuot sa gym ug madisgrasya sa kadalanan.
Sugod sa Disyembre 2, mosaka matud pa ang CSSDO sa mga bukid sa siyudad aron itunol ang mga food packs isip dyutay nga pahalipay alang sa mga nahisgutan.
