Natapos na ang makasaysayanong World Cup career ni Cristiano Ronaldo human mapildi ang Portugal batok sa Spain, 1-0, sa Round of 16 nga gipahigayon sa Arlington, Texas niadtong Lunes.
Sumala pa, si Mikel Merino maoy mipasikad sa nag-inusarang goal sa unang minuto sa stoppage time sa ikaduhang bahin sa dula nga maoy mipasulod sa Spain sa quarterfinals ug natapos sa kampanya sa ilang kaatbang nga Portugal.
Dugang pa, napuno sa emosyon si Ronaldo human sa kataposang sinyas sa referee, diin nakita kining nagluha samtang nagpasalamat ug mipakpak sa mga tagasuporta sulod sa AT&T Stadium. Sa edad nga 41, natapos ang iyang World Cup journey nga adunay kinatibuk-ang 27 ka appearances, nga ikaduha sa pinakadaghan sa kasaysayan sunod kang Lionel Messi.
Lakip sa mga kahinumduman sa iyang makasaysayanong karera, nagpabilin nga kulang sa koleksyon ni Ronaldo ang FIFA World Cup, ang labing prestihiyosong tropeyo sa football, bisan pa sa iyang daghang rekord, kalampusan, ug mga dungog nga iyang naangkon sulod sa iyang propesyonal nga panaw.
Sa kasamtangan, gidayig ni Portugal coach Roberto Martínez ang iyang kapitan, nga iyang gihulagway isip usa ka ehemplo dili lamang tungod sa iyang mga goal ug assists, kondili tungod usab sa iyang dedikasyon, pagpangulo, ug dako nga kontribusyon sa koponan.
Bisan pa niini, napakyas ang Portugal sa pagpukan sa lig-on nga depensa sa Spain nga gipangulohan ni goalkeeper Unai Simón, nga nakapadayon sa 609 minutos nga wala tugoti og goal sa World Cup. Sumala kang Martínez, gisuportahan niya ang desisyon nga ipabilin si Ronaldo sa duwa tungod sa iyang presensya ug abilidad isip top scorer sa koponan.
Sa wala pa ang maong panagsangka, gikumpirma ni Ronaldo nga kataposan na niya kini nga World Cup. Siya ug si Messi mao lamang ang nakadula sa unom ka edisyon sa torneyo.
Sa pagkakaron, nagpabilin nga usa ka makasaysayanon nga hugna sa kasaysayan sa football ang pagtapos sa World Cup campaign ni Ronaldo, samtang magpadayon ang Spain sa quarterfinals batok sa modaog sa duwa tali sa USA ug Belgium.
